Ushbu ilmiy maqolada Omon Muxtorning “Ffu” romanida choʻzilgan unlilar va intonatsion choʻzilishning lingvopoetik xususiyatlari tahlil qilinadi. Tadqiqotda grafik choʻzilish (I-i-i, Yo‘-o‘q, I-ye-ye), undov va takror shakllari (Ox-ox!, Iy-y!), shuningdek punktuatsion choʻzilish (…, kesik gaplar, ritmik bo‘laklash) misollar asosida yoritiladi. Maqolada choʻzilishning badiiy matndagi asosiy vazifalari — emotsional-ekspressivlikni kuchaytirish, inkor va undovlarning pragmatik ogʻirligini oshirish, personajning ruhiy holati va nutqiy temperamentini ochish — ilmiy tahlil asosida ko‘rsatib beriladi. Shuningdek, Omon Muxtor fonetik vositalarni faqat tovush darajasida emas, balki grafik va sintaktik ritm bilan uygʻun holda qoʻllashi, ya’ni choʻzilishni kompleks lingvopoetik mexanizm sifatida shakllantirgani asoslanadi. Tahlil natijasida “Ffu” romanidagi fonetik qatlam oddiy talaffuz unsuri emas, balki semantik, psixologik va uslubiy yuk tashuvchi muhim badiiy vosita ekanligi xulosalanadi. Mazkur maqola Omon Muxtor ijodida fonetik vositalarning o‘rni va, xususan, unlilar choʻzilishining uslubiy imkoniyatlarini o‘rganishda nazariy va amaliy ahamiyatga ega.