Shinalar transport vositasining harakat xavfsizligi, boshqaruvchanligi va iqtisodiy samaradorligini ta’minlovchi eng muhim elementlardan biridir. Ularning xizmat muddati va ishonchliligi ishlab chiqaruvchi tomonidan belgilangan texnik ko‘rsatkichlarga rioya etilishi, ekspluatatsiya sharoitlari hamda texnik xizmat ko‘rsatish sifati bilan bevosita bog‘liq. Tabiiy eskirish me’yoriy jarayon bo‘lsa-da, notekis va tezlashtirilgan eskirish turlari asosan texnik nosozliklar va noto‘g‘ri ekspluatatsiya natijasida yuzaga keladi. Shinalarning holatini muntazam nazorat qilish, havo bosimini me’yorida saqlash, g‘ildiraklarni balanslash va razval-konvergentsiyani o‘z vaqtida sozlash, shuningdek, g‘ildiraklar joyini reja asosida almashtirib turish shina resursini sezilarli darajada uzaytiradi. Bundan tashqari, me’yoriy haydash uslubi, yuklamaning ruxsat etilgan chegaradan oshirilmasligi va mavsumiy shinalarni to‘g‘ri saqlash ham shinalarning uzoq muddat xizmat qilishini ta’minlaydi.