Elektronlar óziniń tartipli qozǵalısı dawamında ótkizgishtiń atomları menen soqlıǵısadı. Bunday soqlıǵısıwlar nátiyjesinde elektron energiyasınıń bir bólegi ótkizgish atomlarına jetkerip beriledi. Nátiyjede ótkizgishtiń ishki energiyası artadı, yaǵnıy ol qızadı. Sol sebepli ótkizgishten jıllılıq muǵdarı ajıralıp shıǵadı. Xojalıqlarda jaqtılandırıw ushın qızarıwshı elektr lampochkalarınan paydalanıladı. Ol tok ótkende spiralınıń qızıwı esabınan jaqtı shıǵaradı. Lampochkanıń tiykargı bólegi jińıshke volfram sımınan jasalǵan spiraldan ibarat. Spiral sımnıń volframnan isleniwine sebep, ol qızǵanda sozılmaydı, 3000°C qa shekem shıdam beredi. Jetilistirilgen qızarıwshı elektr lampochkanı 1879-jılı amerikalı ilimpaz Tomas Alva Edison (1847–1931) oylap tapqan. Búgingi kúnde turmısta, óndiriste, islep shıǵarıwda, kommunal xizmette qızarıwshı lampochkalardan tısqarı suwıq lampalar - inert gazli lampalar da qollanıladı.