Tovush — elastik muhitda mexanik tebranishlar natijasida hosil bo‘ladigan va muhit orqali to‘lqin ko‘rinishida tarqaladigan fizik hodisadir. Tovushning paydo bo‘lishi va tarqalishi uchun manba, muhit hamda qabul qilgich mavjud bo‘lishi zarur. Tovush manbalari — tebranma harakat natijasida tovush to‘lqinlarini hosil qiluvchi jismlardir. Bunga inson tovush paychalari, musiqa asboblari (torli, puflama va zarbli), mexanik qurilmalar va elektroakustik moslamalar kiradi. Manbaning tebranish chastotasi tovush balandligini, tebranish amplitudasi esa tovush kuchini belgilaydi. Tovush qabul qilgichlar — tovush to‘lqinlarini qabul qilib, ularni mexanik yoki elektr signallariga aylantiruvchi tizimlardir. Inson qulog‘i tabiiy qabul qilgich bo‘lib, tovush to‘lqinlarini nerv impulslariga aylantiradi. Sun’iy qabul qilgichlarga mikrofonlar, gidrofonlar va akustik datchiklar kiradi.