Hujayraning oziqlanishi — hujayraning yashashi, o‘sishi va faoliyati uchun zarur bo‘lgan moddalar hamda energiyani tashqi muhitdan qabul qilish va o‘zlashtirish jarayonidir. Bu jarayon modda almashinuvi (metabolizm)ning muhim tarkibiy qismi hisoblanadi. Hujayralar oziqlanish turiga ko‘ra avtotrof va geterotrof hujayralarga bo‘linadi. Avtotrof hujayralar fotosintez yoki xemosintez orqali anorganik moddalardan organik moddalar sintezlaydi. Geterotrof hujayralar esa tayyor organik moddalardan foydalanadi. Moddalarning hujayraga kirishi diffuziya, osmos, faol transport, endositoz va fagotsitoz orqali amalga oshadi.